這是布吉的日落.
一直以來都沒有談及工作上的種種.(當然,私下與友人絮絮不休呼天嗆地足足半年,講到口乾,我似乎真的只把這blog當作客廳了,入房嘛,嘿嘿,得要花點心機與本人混混...)置身其中時,不欲置喙;曲終人散後,不必多言.待生活重上軌道後,我會較能面對得失.許鞍華說,survive一次成功,比survive一次失敗困難,其實兩者皆不容易.
最後三集.鄭生上鏡比真人殘了少許,到最後一日的訪問,紅筋鬚筋都一併跑了出來.在風高浪急烈日當空下唔花粧唔set頭唔訓覺(四天拍三集,仲想訓?),仍能保持如此俊臉,算是相當不俗了.多少女人,到四十歲,已是日落殘紅.上天雖然對男人較為仁慈,但自身的心態才是維繫童顏之道.
一直都覺得鄭生演技欠奉歌藝不濟星味冇乜,能紅了這麼久實在有點不明不白.在畸寶年代,拍攝六壯士(爛片一套)的宣傳特輯時曾一有面之緣,當時我那嘴角刻薄的上上上司說他「細個時比賊偷咗個腦」.事實上,鄭生記稿艱難入戲慢,真令人覺得他傻更更.兩年後,present實料的能力沒有任何改善(難道仲有得再發育?),但他為人真誠,肯有碗話碗已為整件事賦予靈魂.畢竟人到中年,對生活總有些感悟.(看過胡杏兒的訪問,你便知落葉飛風花雪都得來不易)
「我成世人,最大的挫折就係被派入了一間差劣的中學...果時其他小學同學都有靚校舍,我番學就去學鬥木...」
「讀唔到書,好采爸媽從沒比壓力我,總之讀書時唔好食煙唔好拍拖就得了.但畢業出泥,乜都做過,搬運速遞sale屎...搵唔到食,好似對屋企有欠交待.」
「剛入戲劇組時,乜都唔識.有次要演大反派,又攪基又販毒,真係唔識做.兩星期後,監制換人,當時好開心,『我真係做唔泥,換人好,唔洗做...』但幾日後一諗,點算呢?電視台,你一次唔得,全世界認定你唔得.」
「後來監制話,再試下啦,有鑊一齊咩.我再番去開工時,好多人話你應該點點點做.但劉青雲走過來,同我講,『呢個角色,你唔做就輪到我.你一定會聽到好多人講野,但唔洗理,你覺得應該點做就點做』.」
及後在晚上,同行的senior問「想唔想個男朋友好似鄭伊健咁?」.我答,「能令周圍的人都開開心心也沒有什麼不好吧」.三字頭的女子卻說:「呢種人唔會諗將來ga...(下省500)」沒錯,幾十歲仍掛住圍威喂,打機,閒來無無謂謂的以老土手法整古別人,成世人最耿耿於懷的是入了野雞學校,永遠記得的是第一次攞勁歌金榜冠軍...活在昨日.但有幸不必生於憂患,是福氣.現在,就是昨天的將來.真的來了,也沒有什麼了不起,想太多幹什麼.
